3 dagar julefeiring i Santikham
22.desember:
Tante og onkel kom i går. I dag var det julegåveinnkjøp før roen senka seg og me kunne opna eska med julepynten. Juletreet vart pakka ut, 200 lys hengt på og alle var med på pynting. Jenny var mest med som heia-gjeng...
23.desember:
På kvelden kom kyrkjelyden vår, Santitham,på Cristmas caroling. Ca. 30 stk stod utanfor huset vår og sang jula inn... Nydeleg. Etterpå var det frukt, kaker, sjokolade og norske kakemenner.
Då me sat og åt restar etter før-julsbesøket, fann me ut det var på tide med den siste finish'en på julepyntinga; eit skikkeleg vintervindu! Ut for å kjøpa snø på boks (døgnopne butikkar er ein fin ting...) og tape opp plastfolie på vinduet, det får fram frosteffekten. Eit fantastisk resultat!
24.desember
Signe synes det var litt nifst med nissen som skulle kome om natta, og ville helst ikkje hengje opp sokk i det heile... Det var derimot gløymt morgonen etter då ho fann sokken full med "lørdagssnop", nisselue og engel...
Her er mine tre nissar samla julafta morgon.
Etter skandinavisk julegudsteneste var me samla 15 stk for julegraut m/mandel og ursyning av "3 nøtter til Askepott" (nett fått DVD frå Noreg).
Etter at halvparten av grauten var ete (mykje att til riskrem...), og Askepott fått sin prins, var det tid for juletregang. Her i heimen hadd me øvd mest på O, jul med din glede og Rundt om en enebærbusk. Så, me fekk trimma litt før julemiddagen.
Endeleg tid for julepakkane. Onkel Odd Olav las og Signe delte ut.
Det gjekk stort sett i to haugar...
Då våre to minste nissar var vel i seng, sette me vaksne oss til bordet. Pinnekjøtet var akkurat slik det skulle vera, og me åt oss akkurat litt for mette for dessert, slik me plar gjera. Etterpå var det Tufte IL. Me lo oss langt inn i dei små timar....
torsdag, desember 29, 2005
søndag, desember 25, 2005
mandag, desember 19, 2005
Engler daler ned...
Preiketeksten for 4.søndag i advent her i Thailand var om engelen Gabriel som kom til Maria med bodskapen om Jesusbarnet. I vår kyrkjelyd, Santitham, set dei opp liste over kven som får lov til å preike. Eg (Anne Brit) var sett opp to søndagar denne hausten, og i går var det på ny min tur. Må innrømma at eg framleis skuldar på at eg er jo så ny, og får såleis lov til å bruka engelsk... I går prøvde eg iherdig å formidla noko om Guds nåde til oss og at ingenting er umogleg for Gud.
Sidan òg ein engel var sentral i teksten, og det nærmar seg veldig jul, hadde me ein bitteliten juleverkstad etter gudstenesta. Arne hadde kjøpt inn pappatallerkar og glitter, og alle fekk i oppdrag å laga englar. Dette slo verkeleg an! Store og små teikna og limte. Òg biskopen sette seg på golvet og laga sin glitterengel. Tips til kyrkjekaffi-aktivitet heime? Vart ikkje englane kjempefine?
fredag, desember 16, 2005
Tuppen og Lillemor
Eitt hus bortanfor oss bur Line 5 år. Det Line gjer, det gjer Signe òg. Vil Line ha leverpostei på skiva, er leverpostei det beste Signe veit. Har Line fin kjole, må selvfølgeleg Signe òg ha sånn glitterkjole... Av og til vert Line litt lei av all denne "herminga" og då vert Signe sint. Så spring dei til kvart sitt hus for ei lita stund. Men, det varer aldri lenge før dei på ny er bestevenninner og tøyser rundt som berre små jenter kan. Her har me samla nokre bilete av sjarmtrolla.
tirsdag, desember 13, 2005
fredag, desember 09, 2005
Jenny - vesle godjenta vår
Her er Jenny, eit halvt år i morgon! På legekontrollen i dag vart ho målt til 66cm og 7,4kg. Heilt flott etter alle skjema. Med 2 tenner oppe og 3 tenner nede har ho eit ekstra søtt smil, samstundes som ho veit å bite frå seg...
Som dei fleste veit har Jenny hofteleddsdysplasi og har brukt hoftepute til inntil for ein månad sidan. I dag var det tid for ein check-up. Rutine, tenkte me. Men, hoftene til Jenny var ikkje så bra som me trudde. Målingane av venstre foten synte at den enno ikkje var innanfor "normalen". Barnelegen meinte at me burde kontakte sjukehuset i Noreg, "me har så lite røynsle med denne type ting", sa ho. Så, no ventar me på å få høyre frå Barneklinikken/Haukeland. Me vonar Jenny ikkje treng meir behandling, at ho no kan få sparka fritt med beina og øve på kryping. Kanskje det berre treng litt meir tid... Uansett, me veit at ho vert heilt fin og at ho er i gode hender. Det er godt å veta. Takk til alle de som tenkjer på oss og ber for oss. Kanskje me treng det litt ekstra no i desse dagar...
mandag, desember 05, 2005
søndag, desember 04, 2005
Christmas caroling i thaistil
Christmas caroling er vorte ein tradisjon i den lutherske kyrkja her i Thailand. Kvar kyrkjelyd reiser rundt og "syng jula inn" til sine medlemmer. I går kveld var det vår tur: Ungdomsgruppa i kyrkja hadde i god tid sendt ut brev og bedt om å få kome og ynskje oss god jul. Bangkok er sein stor by, og det er vanleg at denne caroling-turneen tek heile natta. Me var difor budde på å vente... Men, kl. 23 høyrde me julesong ute i hagen. Der stod 13 ungdomar med gitar, kubbelys og store smil. Thai-versjonen av "Bjelleklang" var jo ei oppleving! Etterpå var det inn i stova til meir roleg sang og bøn for familien og heimen vår. Ein liten pakke fekk me òg. Enkel servering vert forventa, og våre julevener var svoltne! NMS kollegar (og naboar) Merete og Knut var med, og gjorde sitt til at stemningen var upåklageleg. Etter litt måtte ungdomane vidare, det var enno mange som venta. Det vart nok ei lang natts ferd mot dag... Me vinka dei vel avgarde (13 stk stua inn i ein Toyota pickup) og rusla inn att. Det kjendes godt å vera i Bangkok og få vera del av det kristne fellesskapet her. Måtte desse unge, sprudlande kristne verta rikleg velsigna slik dei i går velsigna oss andre!
onsdag, november 30, 2005
Juletre, julenisser, fantabrus og kvitost
1.søndag i advent var det julemesse i sjømannskyrkja i Bangkok. Me tre jentene reiste avgarde (Arne kvilte febersjuk heime), og programmet var tett: Fyrst gudsteneste, så opning av ny leikeplass i hagen, før julemessa var høgtideleg snorklippa i gong av den svenske ambassadøren. Så mykje fin handlaga julepynt, og så masse kjent og kjær julemat (dog kanskje mest for svenskane...) Julestemninga oste rundt oss, trass i 35 varmegrader og myggbitt. Signe fekk kjøpa fantabrus på boks og var kjempefornøgd, eg åt smørbrød med skikkeleg kvitost og Jenny tok fatt i alt ho kunne kome over. Det var ganske mykje...
Då me stabla oss inn i bilen att hadde me fått med oss 3 små juletre, ein heil familie julebukkar (pappa-bukk, mamma-bukk, signe-bukk og jenny-bukk) og ein pose svensk klissesnop. Julenissane fekk ikkje vera med... Det er definitivt snart jul!
torsdag, november 24, 2005
Signe skulejente
Her er Signe fyrste skuledag, på veg til Nursery på St. Andrews. Kjempekry! Skuledagen er frå 8 - 12 kvar dag, køyrer skulebuss til og frå, det er stas. Ho får allereie masse ros av læraren som seier at "Signe is an independent girl", og det veit jo me foreldre alt om...Engelsk er visst ikkje så vanskeleg heller, no går det i "please", "good morning" og mamma er no "mummy" (for det seier Sophie i klassen til si mamma). Så, det er berre å innsjå; Signe har vorte stor jente, eller lita dame som ho seier sjølv...
tirsdag, november 22, 2005
Santikham Villa
Ein liten presentasjon av heimen vår. Me bur i #8 i Santikham Villa som ligg rett utanfor bygrensa, søraust for Bangkok. Det er eit bittelite bustadområde med berre 10 hus, lite fellesområde og svømmebasseng. Meelong (mor long) og Phoodam (far dam) passar på i porten og ordnar elles det meste på området. Huset vår ligg i enden av husrekka og her har me ein liten hageflekk og uteplass med tak, når sola vert for sterk. Signe og Jenny har fått seg dissestativ, som er til stor glede for dei og nabo-ungar som stikk innom. I nabolaget har me m.a. gode NMS-naboar og elles ein god blanding av thaiar og andre "fahrangar" (utlendingar). Svømmebassenget vert ikkje så flittig brukt no, når det går mot vinter, men er fantastisk både for store og små på varme dagar.
Me nyt dagane her og kjenner oss heldige som får bu så landleg i ein storby som Bangkok!
Abonner på:
Innlegg (Atom)